صحيفة متاريس نيوز السودانية
موقع إخباري شامل تتابعون فيه مستجدات اخبار السودان المحلية و العربية والعالمية على مدار الساعة، وتغطية مستمرة لأخبار السياسة والرياضة.

أها يا حاج فولكر.. الرأي شنو؟

بقلم: صبري محمد علي (العيكورة)

«خلاس تعالو نتحاسب»..!

الاستدعاء والزرزرة التي اخدها (الحاج) من وكيل وزارة الخارجية يوم امس الاول تقول ان الطرد وقد حصل!. 

حاتقول لي كيف صاح؟

اقول ليك انا ….

لو تتذكر البيان المفبرك المنسوب لمجلس السيادة بانه امهل (الحاج) مدة (٧٢) ساعة للمغادرة كان واضحا انه غير صحيح.

وإن أقدم مجلس السيادة على هذه الخطوة المتقدمة فسيكون قد (بلع) الطعم الذي ينتظره العالم الخارجى.

حتى يثبت للعالم ان حكام السودان ديل (عيال ساكت) وينتقل للخطوة التالية من التدخل.

ولكن (براى) الشخصى ان الاستدعاء والضغط الشعبي المؤيد للخطوه قد اوصلا الرسالة للعالم الخارجي مفادها ان هذا الرجل تجاوز صلاحية التكليف وعليه ان يغادر. 

(طيب) الخطوة التى ستعقب الاستدعاء هي خطاب من وزارة الخارجية للامين العام للامم المتحدة.

مع جولة كاربة من الفريق ابراهيم جابر وعمنا السفير علي الصادق للدول الافريقية ذات العضوية بمجلس الامن.

لشرح الحكاية وفضح التجاوز وبالصوت والصورة (كمان) لقلة أدب الرجل يوم (٢٩) يونيو. 

والحاجة التانية شغل ناس الامن وانا غايتو ما بقدر اكتبو لكن هم عارفين نظرية (دق الفندك) واظن الموضوع ده بدأ من عصر ٢٩ يونيو.

والشاهد لغااااية كتابة هذه السطور (الحاج) لم يتفوه بكلمة واحدة. 

(طيب) خلاس ياجماعة نقفل الموضوع ده هنا طالما ان اخواننا (الامنجية) و(الخورجية) استلموا الملف ده خلونا نشوف غيرو. 

و(اللى هو) موضوع (القروش) اااي ياجماعة القروش مش قالوا فى (٥٠٠) ألف دولار جابا الحاج ليوم الثلاثين الانتهى زيو زي اي يوم؟. 

خلاس تعالو نتحاسب ..

نقول (تب) اكلوا ليهم (١٠) ألف دولار شامل العصائر والمكيفات ومش عارف السم الهارى داك. 

وقول (٥٠) ألف دى شالوها قياداتهم! ااى ياجماعة مااا حق السهر وغرف الدردشة والندوات وانتو فاكرين ندوة الجيلى دي كانت بلاش يعني؟. 

اهاا دى بقت كم يا عب باسط (٦٠) الف دولار. طيب قول ياخ رقعوا ليهم ناس كده تحت بند (نثريات) لا يسألوا عنها ب(٥) ألف دولار. 

وقول حق اليوميات بتاعت الشفع المشحوطين فى الشمس ديك ادوهم كوولهم (١٠) ألف دولار. 

وقول البنات (اخوات نسيبة) بتاعتهم قول رقعوهن ب(١٠) ألف دولار تكاسي وكريمات وجلاكسي وكهرباء ورصيد ومناديل واحمر شفاه وكده. 

الباقى كم من ال(٥٠٠) ألف! ياجماعة المنصرف ده مع البحبحة دى كووولها ما فات ال (٨٥) الف دولار اهااا الباقى راح وين؟. 

أنا والله عاوز واحد تفتيحه كده من اولادنا المحامين يشتكي الحاج فولكر (للضب الكبير) اللونكل بتاع الامم المتحدة!. 

ويفهموا انو الزول ده خارتكم عديل ياخ!. 

ويقول ليهم امشوا شوفوا مصاريف مكتبكم فى السودان وارسلوا مراجع قانوني .

المصيبة الاسمو (فولكر) ده يمين سارقهم الضحى الاعلى.

قبل ما انسي :—

نعلن كامل تعاطفنا مع (الحاج) وصادق مواساتنا لفشل يوم (تلاتينو).

ونبدى عميق اسفنا لحالة النصب التى تتعرض لها الامم المتحدة بالسودان من اللغف والنهب المصلح وبفعل فاعل .

* خاص بـ(متاريس) 

الجمعة ١/ يوليو ٢٠٢٢م

تعليق 1
  1. احمد يقول

    والله ياعيكوره دايما بتجيبة وارمه

التعليقات مغلقة.