متاريس السودانية
موقع إخباري شامل تتابعون فيه مستجدات اخبار السودان المحلية و العربية والعالمية على مدار الساعة

فى حاجة كده ما مفهومه!!

بقلم / صبري محمد علي (العيكورة)

(الله يكضب الشينة)

بصراحة كده يا (عب باسط) أنا زعلان من قائد الجيش! مش تقول لى ليه؟ أقولك أنا.. يا اخي الوضع أصبح غير مطمئن وضبابي لأبعد الحدود! أقول ليك كيف.

السيد البرهان نقل عنه فى رمضان (القريب ده) والعهدة على الصحفية سهير عبد الرحيم ان تشكيل الحكومة سيكتمل او سيعلن عنه قبل عطلة عيد الفطر و(أهو) يا سيدي عيدنا ورجعنا بالسلامة والحال فى حاله .

(طيب) قبلها بفترة ليست بالطويلة وسعادة الفريق يقول ضمن احتفائية عسكرية أن السيد (فولكر) تجاوز صلاحية مهامه وقد يُطرد من البلد!.

قُلنا كلام (سمح) وإن أتت متأخرة لكن (أهو) أحسن من العدم .

السيد فولكر (إبن اللذينا ده) سمع التصريح (طوااالي) طلب لقاء البرهان ووقع ليهو فى الواطه ووعده بمراجعة كل ما يرفع له من تقارير قبل إرسالها (للضب الكبير) الامين العام للأمم المتحدة و(إتجرس خااالس).

لا ومش كده وبس أنهي ليك عقد الشيوعي أمجد فريد باعتباره هو من يقف خلف التقرير الاخير .

ولو كنت (محل البرهان) ما بصدقوا نهاآآآئي قول لي ليه؟ لان بصراحة ممكن يستغل أمجد فريد (غواصة من منازلهم) ويرسل تقاريره عاادي عبر الوسائط ومش المكتب ده (تب) ما يعتبو تاني . المهم سعادة الفريق فهمها ما فهمها المهم انه مشاها ليهو .

المفروض بعد كده يا (عب باسط) ان (الحاج) فولكر يتعظ ويقعد مؤدب! مُش كده؟.

لا ولان الهدف (عندهم) سامي جداً ودونه الدولار الاخضر والعمالة الزاهية فلا بد للمخطط ان يمضي لنهاياته وهو تمكين اليسار عموماً وأربعة طويلة بصورة خاصة .

(قووم إنتا) يا فولكر أعلن عن ما أسماه مؤتمر الحوار الوطني بقاعة الصداقة (حسب سمعي) والذى سيعقد أيام العاشر والحادي عشر والثاني عشر من هذا الشهر (مايو)!.

والدعوة اقتصرت على أحزاب اربعة طويلة التى لا تتجاوز 2% من القوي السياسية بالسودان شُفتا كيف؟ بما فيها واجهات الحزب الشيوعي.

واستثني من الدعوة القوي الحية والطرق الصوفية والادارة الاهلية ومنظمات المجتمع المدني بأحزابها الكبيرة (طيب وطني كيفن)؟ أسألني يا عب باسط! والله مُش عارف!. 

(بإختصار كده) المخطط (الفولكري) الخبيث واضح وهو إعادة اربعة طويلة للحكم بمباركة القوى الاستعمارية حتى يسهل نهب خيرات الوطن وانتقاص سيادته وتعيين رئيس وزراء يساري والعمل على تفكيك واضعاف الجيش.

و(برضو قال ليك) إعادة لجنة (وجدي شاشة) للمشهد السياسي مع إلهاء وخلى لى بالك من كلمة (إلهاء) هذه! إلهاء الرأي العام بتعديلات طفيفة بالوثيقة الدستورية حتى يتوهم المواطن البسيط ان العهد القادم سيكون أفضل مما مضي .

الكلام ده (كُلللو بحصل) والحكومة ساكته والكلام ده بحصل ولا فيهو سطر واحد عن قيام إنتخابات! والكلام ده بحصل (وغايتو ما عارف) سعادة الفريق البرهان رضيان بيهو واللا (بغسل فى البركاوي)؟ فالعساكر دائما ما بفوزون بالضربة القاضية و(الله يكضب الشينة) .

قبل ما أنسي : ـــ

تحت تحت قالوا (الكركجة) جاياهم من جُوّة … ننتظر و نتابع. 

* خاص بـ(متاريس

الاثنين 9/ مايو 2022م

اترك رد

لن يتم نشر عنوان بريدك الإلكتروني.