كان نفسي أقولك من زمان
بقلم: صبري محمد علي (العيكورة)
اجتماعات مغلقة لمجلس الوزراء الانتقالي لمراجعة وتقييم الأداء الحكومي كان هذا هو عنوان خبر بالامس تقول تفاصيل الخبر ان مجلس الوزراء ووكلاء الوزارات سيعقدون اجتماعاً ولمدة ثلاثة ايام ابتدأت امس الخميس وحتى السبت (شفتو الشغل كيف) ما الجماعة مشغولين خااالس باقى الاسبوع . عشان شنو؟ قال لمناقشة برامج الحكومة الانتقالية خلال الفترة الماضية! وبعدين قال وتقييم الاداء الحكومي. سمح! ومتابعة البرامج والخطط والمشاريع التى تم وضعها ضمن الاولويات الخمس.
الجديد فى الامر قال الخبر ان الوكلاء اول مرة يشاركوا فى اجتماعات مجلس الوزراء. ومن المنتظر ان يقدم الوزراء والوكلاء خطتهم للمرحلة القادمة ومناقشتها! ولاحظ معاي انو الاجتماع مغلق! طيب ما تخلوا الاعلام يحضر عشان يبشر الناس بما سيخرج به الاجتماع! خلاس يا زول قبلناها بلاش صحفيين ووجع رأس.
وتواصل الخبر يذكرنا بالاولويات الخمس التى وضعها مجلس الوزراء بداية هذا العام يعني الجماعة عاوزين يجردوا حساب الستة شهور الماضية.
خلى بالك معاي عزيزي القارئ الاولويات الخمس التى يفترض ان تكون الحكومة قد (نجضتها تب) من زمااان هى المحور الاقتصادي والاجتماعي وتفاصيل مشاريعهما ديل اتنين وتاني؟.
قال ليك يا عمك ومحور السلام والامن والعلاقات الخارجية والرابع هو الانتقال الديمقراطي والمهددات التى تحيط به والخامس قال استكمال هياكل السلطة الانتقالية. طبعاً دي المرة العشرين بتكلموا عن استكمال الهياكل دي.
خلينا ناخد نفس بعد وقع لينا سبب اجتماع الايام الثلاثة الحُسُوم لمناقشة برنامج الحكومة الفات والجاي. مالو ياخ كلام كويس جداً جداً، خلونا نجي على رأيهم واحد واحد.
المحور الاقتصادي والاجتماعي! شايفين حاجة يا جماعة؟ اظن جبريل نشف ريقنا بالدولار الجمركي والمحروقات فى زول يا جماعة شايف ليهو مشروع اقتصادي او اجتماعي جمبو يقول لينا عشان ما نظلم الناس ساكت! طيب (أقلب الصفحة).
وبعده محور السلام والامن والعلاقات الخارجية. غايتو السلام ماشين فيهو كويس والامن ده نُص نُص اما العلاقات الخارجية دي غايتو ما سامعين حاجة غير (سد النهضة) لكن برضو أسألوا الدكتورة مريم عشان ما نبخس الناس سفرياتهم ساكت.
اما الانتقال الديمقراطي ده انا غايتو شايفو طشاش طشاش واظنه تمامة عدد ساكت فى كل اجتماع بكتبوه. فما لم تصرح الحكومة بتاريخ انتهاء الفترة الانتقالية وتسبقها بقرار تكوين اللجنة العليا للانتخابات سيظل الحديث عن التحول الديمقراطي كلام ساكت وعبارات لكسب الوقت.
اما محور استكمال هياكل السلطة الانتقالية فوالله ده كلام عجيب خلاس الآن خمسة شهور و زيادة وشركاء الحكم ما زالوا فى كراسينا وكراسيكم. لكن السيد حمدوك فى خطابو الاخير قال خلال شهر ستكتمل هياكل الحكم وربنا يسهل ونخلص من مسلسل (ناسنا اكتر من شبابكم) بطولة حزب الامة وفلم (ادونا حقنا) إخراج الاتحاديين و(تتعشوا برااكم) آخر إصدارة للثورية وبقية الشعب السوداني الفضل منتظر باقى الصينيه بره الحوش.
قبل ما أنسي :
الاجتماعات الطويلة (برأيي) لن تحل مشكله فلو خُصص لكل وزير او اثنين يوم اثناء الدوام الرسمي لكان انفع واكثر مدعاة للتركيز واثراء للنقاش وتاكيدا على التوصيات المحددة والمحكومة بمدة زمنية لانفاذها. اظنه اجدى من الاجتماعات الطويلة التى غالباً ما يملها المجتمعون ويحدث فيها نوعا من الضجر وشتيت الكلام.
وقد تصل لدرجة الاستغراق والتأمل فى إضاءة القاعة والستائر ولون الكراسي والمقارنة الصامته بين طاولة الاجتماعات الكبيرة والباب ومن ادخل القاعة أول الطربيزة ام الباب. واللاّ شنو يا جماعة.
* خاص بـ(متاريس)
الجمعة ٢٥/ يونيو ٢٠٢١م