تاني مرة قبل العواسة جهزوا الطايوق!

بقلم: صبري محمد علي (العيكورة)

القرارات التي تنزلت علينا بعد أيام (سوبا) الثلاثة تذكرني بمن يسابق أذان الفجر في رمضان كلفتة وعدم تركيز ومحاولة تناول اى حاجة وكل حاجة في اقصر مدة والتى هنا هى الثلاثين من يونيو! يا جماعة قولوا بسم الله الفيها النصيب بتلقوها.

وقبل ما انقل لك كلام من سبقوك بوزارة شؤون مجلس الوزراء يا خالد سلك دعنا نستعرض بعضاً من محاولة (الجغم) قبل الاذان التى مارستها الحكومة يوم داك.

 استمرار الدعم الحكومي للدواء وغاز الطبخ والكهرباء والدقيق أهااا اين الخطة والآلية والتمويل إذاً هذا ليس قراراً بل خطة عمل عليكم القيام بها. 

البدء الفوري في حملات فرض الرقابة على الأسواق (خطة قدييييمة) اعلن عنها وزير التجارة على جدو وازيدكم من الشعر بيت بتبدأ الاول من يوليو!.

تسليم الذهب والعملات المهربة لبنك السودان (طيب وزمان كانت بتمشي وين)؟.

البدء فوراً في ادخال مليون اسرة تحت مظلة التأمين الصحي بتمويل من ديوان الزكاة ووزارة المالية! برضو مش قرار عمل دونه السهر والليالي وأسألوا الكيزان.

تقديم منحة شهرية قيمتها عشرة مليار جنيه اعتبارا من يوليو 2021م (القريييب ده) يعني يا جماعة اسكتوا القروش جاياكم! سمح بس ان شاء الله ما تلحق رواتب ود البدوي كمان!. 

بداية استيعاب خمسة آلاف موظف وموظفة! قال بالعاصمة والولايات متين؟ ونقدم واللا نستنا شويه؟ لا تفصيل اذاً خطة لم ترسم اساساً. 

معالجة تشوهات الرواتب مع بداية العام 2022م اين القرار هنا؟. 

أغرب حاجة قبول طلاب الصف الاول ابتدائي بالمدارس الحكومية مجاناُ طيب ولماذا الصف الاول فقط؟ هل التلميذ هنا سيكون قد أخرج من الامية؟ بل وهل سيحسن القراءة والكتابة؟ غايتو كلام عجيب قلت ليك الناس ديل شغالين بلع قبل الاذان.

توفير التمويل اللازم لمدخلات الانتاج قرار ام خطة عمل؟ ومش عارف البدء في اكمال مشروع كهرباء قري (3) يا جماعة هسي القرار هنا وين؟ على كل حال نتوقف هنا. 

وهاك يا خالد سلك درس مجاني تبرع به الاستاذ بدر الدين حسن محمد مدير شؤون الرئاسة الأسبق بوزارة مجلس الوزراء . جيب ليك ورقة وقلم واكتب معاي يا خالد : ـ

يقول الاستاذ بدر الدين مجيباً على سؤال نعم القرار في مجلس الوزراء يمر بعدة محطات وفق مسار متفق عليه تبدأ من الادارة او المؤسسة او الهيئة التى تتبع للوزارة (يعني ياخالد لمن تكلمنا عن كهرباء قري تكونوا بديتوا الحكاية من تحت وليس من فوق) سمح وتاني؟.

يقول السيد بدر الدين ثم ترفع من الوزارة للادارة العامة للقطاعات بمجلس الوزراء (القطاع السيادي او الاقتصادي او الثقافي الخدمي) وبعد داك يا سلك يعرض على الخبراء والمستشارين ومن ثم تحويله لوزارة العدل (دي سمعت بيها؟) اسمعني طيب.

قال ليك وذلك (لتحرير الشهادة الدالة على سلامة الاجراء من الناحية القانونية والدستورية (شغل نضيف لكن) ثم رفعه لمجلس الوزراء لاجازته وتحويله للادارة العامة للقرارات لصياغته واعطائه رقم حسب التسلسل ومن ثم يوقع من رئيس مجلس الوزراء ويصبح واجب النفاذ.

وبعد داك تشوف الادارة العامة للمتابعة شغلها. (أهاا رأيك شنو في الحصة دي يااا باشمهندس)؟. 

قبل ما أنسي : ـ

كانت أمهاتنا عندما تبدأ احداهن في عواسة الكسرة تجهز ليها مسحه وطايوق (مُخ البهيمة) عشان الصاج واللا الدوكة تكون سالكة في العواسة فيا جماعة تاني مرة قبل تمشوا (سوبا) جهزوا الطايوق الطايووووووق . قلنا ليكم ألف مرة الحكاية ما لعب.

* خاص بـ(متاريس)

الاحد ٢٧/ يونيو ٢٠٢١ م

زر الذهاب إلى الأعلى