رأيك شنو يا الفاتح جبرا خط «هيثرو» لم يُباع!
بقلم/ صبري محمد علي (العيكورة)
بالامس اوردت هذه الصحيفة [متاريس] وتحت عنوان شاهد اتهام فى قضية خط هيثرو يفجر مفاجأة بخصوص البيع و(الحدث) ايضاً وتحت عنوان (مفاجأة داوية خط هيثرو لم يتم بيعه) ! نقلاً عن شاهد الاتهام الخامس فى القضية السيد ياسر سيد احمد الحسن وهو كان يشغل مدير الادارة القانونية السابق لشركة (سودانير) واكد عدم بيع حق الهبوط والاقلاع فى مطار (هيثرو) للشركة البريطانية (بى أي ام) وان ما تم هو اتفاقية تبادل بالرمز لزمن الهبوط والاقلاع دون مقابل مالي.
(طبعا العبد لله مش فاهم ابو النوم) من جملة تبادل بالرمز ولكن ما فهمته انه لم يباع يا الفاتح جبرا ونفى ان تكون شركة عارف الكويتية او احد منسوبيها قد تسلم عائد مادي جراء التبادل . واكد شاهد المحكمة ان سودانير بامكانها استعادة زمن الهبوط والاقلاع متى ما توفرت لها الامكانيات ومنها اسطول طائرات من طراز محدد يلبي اجراءات السلامة الجوية للاتحاد الاوروبي يعني بالعربي كده جماعتنا ما عندهم عِدة للخط ده !
اذا أول حاجة فنقول للفاتح جبرا الفاتحة الفاتحة وعليه يطوي (شنووو) والواوات الكتيره بتاعتو ديك ويمشي يبلها ويشرب مويتا وبعد يروي تب ويشبع من فسح القاهرة يجينا بى راحتو ما الحكاية حساب يا جماعة اذا كان الزول ده ومنذ سنوات عديدة مصدع روسينا ب (شنوووو) ولن نتوقف مش عارف حتى نراهم خلف القضبان والردحي الذى مارسة بمهنية عالية فى كتاباته المقبوضة الثمن (بالشئ الفلاني) والبعيدة عن العرف الاخلاقى والمهني .
اتذكرون يوم ان استضافته احدي القنوان عبر الاقمار الاصناعية وكان ضيف البرنامج آنذاك الراحل الشريف عمر بدر . وقال جبرا في ما قال (لا فض فوه) لوكنت مكان الشريف لما اتيت للاستديو تنتراً واستخفافاً . أهاااا يا جبرا الشريف والزبير وقد ذهبا فى ذمة الله وستجتمع بهم عند من عنده تجتمع الخصوم سبحانه.
فاين ستذهب
ما الناس ديل برضو عندهم اهل وعوائل وقبائل وكده وحقهم ما بخلوه طالما ان (العليقة) بتاعتك كانت (قوية) و مغيباك طيلة السنوات الماضية بالشكل ده فاظن ذوي المظلومين من لسانك غير مطالبين بالصبر بعد اليوم على تطاولك على ابنائهم و اظن كلام شاهد الاتهام بتاع البارح ده قلب الطاوله (كلوكولو) وبعد ده اظنك تشرب ما تروي.
فالسيد الوزير السابق كمال عبد اللطيف محبوس داخل (كضبتك) والسيد العبيد فضل المولي برضو كذلك ومن مات مات مغبوناً من كضبك فالناس ديل ما حا يخلوا حقهم . الا اذا فعلت حاجة واحدة وهى ان تعترف وعبر ذات المنابر والكسرات والشنوهات بتاعتك بانك كنت مخموماً ومغيباً وجاهلاً و تكشف عن مصادر معلوماتك المغلوطة التى ظلمتهم بها وانك ندمان وسافى التراب إمكن الجماعة ديل يتفاكروا فى موضوع الصفح عنك.
ياخى انت ما خليت زول شايل لسانك تجلد فى الابرياء بالحق وبالباطل وآخرها (لبدت) فى القاهرة تبث سمومك من هناك أها القريشات وبكرة بكملن والله الفراعنة ديل تفلس يشوتوك زي السلام عليكم .
فيا اخي لا اظن هنالك بعد السبعينات عمراً يُرتجي طوله فعد الى وطنك وتحلل من من ظلمتهم بلسانك وقلمك قبل ان يأتي يوماً لا ينفع فيه مالٌ ولا بنون.
قبل ما انسي : ــــ
اوردت [متاريس] البارحة وتحت عنوان : لجنة ازالة التمكين تشتكي شح التمويل وهجرة الكفاءات !
ياخ لكن ده صنف رهيييييب ياخ . ما فى مشكلة ياعم حا نعمل ليكم (شيرنق) ! اما هجرة الكفاءات دي حلوها براكم .
خاص بـ[متاريس]