عليّ الطلاق هذا ما توقعته
بقلم: صبري محمد علي (العيكورة)
بالأمس كتبنا مقال بعنوان (عاجبك كده يا وجدي)؟ تناولت فيه اللغط الذي صاحب موضوع الأسلحة التي قيل ان السلطات قد ضبطتها بمطار الخرطوم اليومين الماضيين وان السيد (وجدي العسل) طار بالموضوع وقال إنها أسلحة تخص (الأمن الشعبي) بسسسسم الله! آآي قالا عديييل كده بلا خجل! يا خي وين الأمن الشعبي وين الكيزان يا حليلون.
اهاا قبال الشمس تغيب صدر بيان من شرطة الجمارك تؤكد ان الشحنة عديييله ومستوفية لكافة المعايير والخطوط الاثيوبية كونها الشركة الناقلة قالت إن الشحنة كانت لأسلحة عبارة عن (بنادق صيد) تخص احد التجار السودانيين وانها مكتملة المستندات ويعني بالعربي كدة الشحنة دي (حلاال) وما فيها اى شبهة وحكاية (الامن الشعبي) طلعت رجفة ساكت طبعاً البارح السيد وجدي بكون وشو يلعن قفاه من الخجلة.
الخطوط الجوية الاثيوبية بدورها ذكرت عبر موقعها الرسمي ان جميع ممتندات الشحنة بحوزتها ومن ضمنها خطاب من وزارة الخارجية وبكده يكون (لا وجدي لا مريم) ناقشين حاجة.
لذا أعلنت الخطوط الإثيوبية انها ستعقد مؤتمراً صحفياً اليوم بالخرطوم ودعت له الصحفيين ووكالات الانباء!.
ولكن قبل قليل أوردت(بمتاريس) و تحت عنوان (جهات حكومية تتدخل لمنع مؤتمر صحفي للخطوط الاثيوبية) وذكرت وفقاً لمصادر متطابقة ان جهات حكومية (دون ان تسميها) لكن في منو غير ناس عبد القادر! هذه الجهات تدخلت لدى إدارة فندق (السلام روتانا) مما دعاها لالغاء المؤتمر الصحفي.
طبعاً طبعاً ما لازم يعملوا اى حاجة في سبيل حجب الحقيقة من ان تطير بها الاسافير ما لازم يمنعوهم يعني عاوزنهم يقولوا للناس ان لجنة إزالة التمكين بتكضب كمان؟.
وطيب افرض خلوهم وقالوا كلامهم اهاا السيد وجدي ده بودي وشو وين تاني. وحقو يتعظ من الحادثة دي ما كلما لفح ليه طرف خبر لفح شبشبو ويالمكرفونا جاك زول.
يا جماعة اتقلوا شوية. وهسي بالله لو حسبوها بالعقل كده في أمن شعبي و اللا جن أزرق بجيب ليهو سلاح عبر المطار؟.
قبل ما انسي : ــ
نكتة ظريفة لكن ننتظر غيرا .
* خاص بـ(متاريس)
الثلاثاء ٧/ سبتمبر ٢٠٢١م