أين يا وجدي

بقلم: صبري محمد علي (العيكورة)

بالأمس وخلال اامؤتمر الأخير للجنة (العسل) قال السيد وجدي صالح إن الكيزان هربوا أموال كان تخص انشاء طريق (دنقلا ارقين) وقدرها (٥٥) مليون دولار نعم ياجماعة (٥٥) مليون فقط لم يشير السيد وجدي انها (داخلا) ضمن ال (٦٤) مليار التى قيل سابقا ان الكيزان هربوها الى ماليزيا ام لا.

طيب الجديد ان السيد وجدي قال هذه المرة بحسب (متاريس) ان تهريب ال (٥٥) مليون ياجماعة لاحظوا مليون وليس مليار قد تم الى (البحر الكاريبي) يقول عبر شركة اسسها عبدالباسط حمزة وعوض الجاز وكده.

العبد لله ما بليد للدرجة دي في الجغرافيا فقلنا نشوف حقنا ده مشى وين؟ ما انتو برضو ما احرص مننا على هذا الشعب ده.

البحر الكاريبى (الرماهو السيد وجدي البارح) كده ما فى حاجة اسمها زول برمي ليهو قروش فى بحر . اهااا قلت أشوف عمنا قوقل.

نعم نعرف ان جزر الكاريبي بتقع شمال شرق امريكا الشمالية واقل عدد لهذه الجزر (٤٢) جزيرة وهناك تصنيف يقول انها (٢١) جزيرة لكن العدد الكلي (٧٠٠٠) جزيرة (على ذمة العم قوقل).

طيب يا استاذ وجدي ما نحن برضو الشمار ده بهمنا فما معقول تقول هربوها للبحر الكاريبي أو مش عارف مناطق التهرب الضريبي أو الملاذات الآمنة و تسكت! ما لازم نعرف قروشنا دي مشت وين وفى ياتو بنك واللا شنو يا عمك؟.

قبل ما انسي :–

ياخى ال (٥٥) مليون دولار بتاعت البارح دي عفيناها تب للكيزان (اولاد الذينا ديل) شوفوا لينا الاربعة وستين مليار بتاعت ماليزيا! مش ده المنطق بقول كده؟.

غايتو جنس جهجهة لكن!!.

* خاص بـ(متاريس)

الجمعة ١٧/ سبتمبر ٢٠٢١ م