الإثنين 21/12/06

خليك «ريلاكس» واسمعنا مرّه

بقلم / صبري محمد علي (العيكورة)

الحكومة المدنية ماذا تقصد بها (قحت) ؟ السؤال يبدو بسيطاً ولكن الاجابة عليه تجعل القحاتة يخرجون عن طورهم وتصيبهم (الكاروشة).

والاجابة عليه تلخص كل هذا الهياج والصراخ والمآتم القحتاويه هذه الايام واكثر فئة يجب ان تفهم وتدرك الاجابة الصحيحة هى فئة الشباب والشابات لانه (بصراحة كده) اولادنا ديل خموهم خم شديد خالص واستغلوهم كمطية للكراسي وسبيل لتنفيذ الاجندة الخارجية مستغلين فيهم حماس الشباب وفورة الصبا.

وزادوهم كيل بعير باطلاق الالقاب والنعوت الثورية وصفات الفروسية ودفعوا بهم وقوداً لاجندتهم واختبأوا هم واسرهم داخل المنازل المكيفة (طبعاً ده لو كانوا داخل السودان) غير كده فكثير من من (يذُق) بابنائنا داخل المحرقة هم فى الحقيقة خارج ارض المعركة وارض السودان.

طيب يا شبابنا تعالوا اقول ليكم كيف فهموكم المدنية (اوول) حاجة كرهوكم فى العساكر عموماً بتتذكروا (معليش معليش ما عندنا جيش) وبتتذكروا (كنداكة جات بوليس جرا) وبتتذكروا الاناشيد والاهازيج البخلوكم فيها تحركوا يديكم الاثنين بالتناوب ومرة بالسبابة و الوسطي! وتتذكروا لمن علموكم (فلفيل الشعر) والبنطلون (داقي سيستم) كنوع من انواع التحضر والانعتاق من قيود الاسرة.

بتتذكروا يا شباب ندواتهم المتسارعة وكلامهم بان هدفهم تفكيك الاسرة ! تتذكر يا ابني لمن خلوك تقل أدبك وترفع صوتك على عمّك وخالك لانه (كوز) ! الكلام ده كله وغيره كان مقدمة لهدف اخراج المجتمع عن دينه واخلاقه وتقاليده.

طيب وليه فئة الشباب بالذات ؟ لانه (ياعسل) ناس انا وابوك خلاس شمسنا غابت وما بقدروا علينا والرهان بقي على من هم اطول عمراً فى تقديرهم وهم انتم الشباب.

أهاا بعد داك قالوا ليكم المدنية تعني (الحكم اللا عسكري) ! وفى الحته دي بحيلكم الى (اليوتيوب) والوسائط الاخري واستمعوا للقراي وسلك و الرشيد سعيد ومحمد ضياء الدين و الندوات حقتهم.

كلهم ذكر بجهل او بعلم ان الدولة المدنية هى الدولة (اللا دينيه) لا ومُش دينية كده وبس عشان نقول معانا ناس تانيين قال ليك ثورة ديسمبر جاءت لتحرر السودان من (الاسلامويين) و واحدين كده بهذبوها شوية بقول ليك (الاسلام السياسي)!

طيب التحرير ده لصالح منو طالما انهم عايشين بره البلد و لزوم قومة النفس شنو؟ لانو يا حبيبي كل شئ بثمنه والشغلانة بالدولار عدييل اهااا تقول لى ليه يعملوا كده اقول ليك (المعايش جبارة) عاوزين يعيشوا مرفهين بره هم واسرهم وانت واصحابك تروحوا فيها.

وخليني اجيك كده من الآخر بالله الناس ديل منذ استلامهم للسلطة فيهم مسؤول واحد وقف على حواشة قمح واللا مصنع وشاف مشاكلو شنو ! واللا طوالى دخلوا فى الغريق ! المناهج وزارة الشؤون الدينية ومش عارف وزارة العدل ! طيب وين الوزارات الخدمية الاخري الزراعة و الصناعة والصحة ؟ لان الهدف يا حبيبي معروف والخطة مرسومة.

عشان كده بقول ليك (اصحي يا ترس) و ترس دينك و حصن واحمي اخواتك بصلاتك وبعضلاتك وبنفس الاسلوب و بكل عزة نفس قل لمن يطرق بابك (قوم لف يا عاطل العصر اذن).

قبل ما انسي : ــــ

هى الامور كما شاهدتها دول من سره زمن ساءته ازمان … وما دائم الا وجه الحق

الفاااااتحة .

اترك تعليقاً

لن يتم نشر عنوان بريدك الإلكتروني.