بالدارجي.. رسالة من مواطن سوداني إلى عبدالفتاح البرهان
بقلم / بخاري ابوشارب
حمدوك اذا صدقت تنبؤاتي سيستقيل خلال 30 – 60 يوم بالكتير لانو ماجاء عشان خاطر عيون السودانين انما لتعديل السيرة الذاتية.
بدلا من عملت رئيس وزراء واقلت يوم كذا، الافضل تكون استقلت يوم كذا / مستقيل لتسويق نفسه لمنظمات الامم المتحدة وقد نجح والان كم منظمة اممية تتيح له فرصة في وظيفة كبيرة.
يلا يابرهان جهز ليك رئيس وزراء تاني وفكنا من حكاية الرجل دا وانت تعلم سيرته قبلنا وهل له انجازات، حمدوك فاشل قياديا وسياسيا فهو مجرد موظف وحايظل الي قيام الساعة موظف.
دا سقف عقليته يااخي لايمكن ان يتجاوز ليك السقف دا بعد عمرا ناهز الـ60 مش لو علي راس حكومة تكنوقراط ياسعادتك هو بالحزب لم ينجح وبالحاضنة لم ينجح يعني كيف حاينجح بمفرده وخصوصا انه هو ليس من اصحاب الكارزمتك.
الله يرضى عليكم يا جنرلات فكونا من ها السيرة واكسبوا الزمن ياجماعة الشعب دا بموت جوعا، مستوى الخدمات دون الصفر مستوى الامن صفر البنية التحتية انهارات تماما لاصحة لا تعليم.
ربنا بسألكم من الكلام دا دي امانة والحكم تكليف ما تشريف انتو ناسين الموت يعني ولا ناسين حساب ربنا ليكم.
معقولة لكن 3 سنة نحن منتظرين حمدوك زعل حمدوك رضى مالنا ومالو ياخوانا الشعب بمووووووت حمدوك يطير في السماء ويطلع شنو هو لاسيرة لا مسيرة.
يااخوانا حمدوك دا هو وشلتو اليساريين ديل كلهم ما بساوي 100 فرد يعني عشان رضاهم هم يموت الـ40 مليون نسمة من الشعب السوداني ولا كيف.
غايتو لعلمكم نحن تحت ومواكبين الراي العام وعايشين الواقع المؤذي والتاريخ لن يرحمكم ولن يغفر لكم والله وتالله الذلة الضاقه الشعب دا الان في عهد كل الديمقراطيات والانتقاليات والانقلابات السابقه ما ضاق ربعا.
ياجماعه الناس بتبيع اثاثات بيوتا عشان تعيش الايجارات في الخرطوم وصلت عنان السماء وقفة الخضار بقت راتب 3 شهور ما بملاها ياناس اتقو الله وخافو ربكم المرضى اصبحو يبحثوا عن الموت للراحة لا عن العلاج لانهم عارفينو معدوم وان وجدت بعد عناء فهي باهظ التمن.
انفلاتات امنية في كل حلال وقرى وارياف السودان غياب هيبة الدولة وتعطيل سيادة القانون، يابرهان الكلام دا ربنا بسالك والله ربنا بسالك انت المسؤول مننا امام الله يوم لا تفيدك حصانة ولاتترافع عن حاضنة يوم تنعكس التعليمات عليك فيوحي ربنا لكل اعضاء جسمك لتشهد ضدك بمافعلت يابرهان، اليوم دا عارف انو حيمر عليك وماذا اعددت له؟.
الى شرفاء القوات المسلحة وقيادات القوات المساندة لها الحكم امانة وان الله لسائلكم عن ظلم الفقراء جراء فشل حكومة الحمدوك.