السبت 23/02/04

الكلام ده ماكل معاي جمبة خااالس!!

بقلم . صبري محمد علي (العيكورة)

السفارة البريطانية فى (سودانا الهامل ده) تدعو لافطار رمضاني

 

تدعو له احزاب (قحت واحد) فهل ناس عمنا على الصادق عارفين الكلام ده واللا لا ما عارف.

المهم يا صاحبي خلينا نقول (كايسين الاجر) وكده وفطور العملاء حسب ما هو (لافى بالميديا) حتى مساجين (سوبا) قال ليك يا عب باسط خصصوا لهم كراسي خالية ووضعوا عليها ورقة كتب عليها اسم كل قحاطي سجين!(فى حب يا اخوانا اكتر من كده)؟. 

غايتو سويتو فطور ما سويتوه الموضوع ده خلاس روووح يومين تلاته وستعلن حكومة الكفاءات!. 

الموجعني خااالس ان هذه السفارات الرافعة الكلفة والحكومة نايمة فى العسل يا جماعة.

ياعمك شوفو لينا المواثيق والاعراف الدبلوماسية المتبعة عالميا وين؟ المعازيم وعرفنا عمالتهم وبطينيين كمان. 

لكن قوة العين التى يمارسها بعض السفراء الكلام ده حدو وين؟. 

ياناس السيادي البلد دي ما حقت ابهاتكم! المعروف فى مثل هذه المناسبات ان الدولة المضيفة تحاط علما بها.

فهل (الشغلانة دي) مرت بالخارجية وجهاز المخابرات و مجلس السيادة ام زيها زي حوامة شارع النيل بالاردية؟ الكانت ايام التغيير زمان.

فما من شك ان وجود مخزن (بركاوي) بجوار القصر الجمهوري اصبح ضرورة ملحة لمثل هذا الخمج واللا شنو ياعب باسط؟. 

قبل ما انسي : —

آآآ ناس هوي فتحوا عينكم سمح . ده وطن ما هو لعب !!!

* خاص بـ(متاريس)

شاهد أيضاً

الآلية الثلاثية تتنصل من خطاب إلغاء الحوار الوطني

الإطاري بين حسابات الحقل وحسابات البيدر

بقلم: إبراهيم عثمان ▪️ تخطيء أحزاب فولكر كثيراً إذا ظنت أنها بما نالته من دعم …