اللًولوه.. شنو؟
بقلم: صبري محمد علي (العيكورة)
فى سودان العجائب بتاعنا ده كل حاجة ممكنه
(قول لى كيف)؟
يعني مُمكن جداً تعرس الليلة بكرة أهل العروس يجوا يشيلو بتهم يقولوا ليك ياخ والله معليش لقينا زول أحسن منك أو غيرنا رأينا ! (آآآي يا عب باسط).
ممكن عااادي جداً تشتري قطعة ارض وتوثق وتكمل إجراءآتك وبكرة البائع والسمّسار يقولوا ليك (نطينا) هاك قروشك!.
وممكن جداً يعينوك وزير كده وبعد يومين يقولوا ليك معليش ياخ (الرئيس دقس) و ما قاصدنك إنت!.
تتذكروا حكاية (أمممك عينوه …أمممك فصلوه) التى ظل يمارسها رئيس الوزراء (حمدكا) والفريق البرهان يومها ؟ تتذكروا لعبة.
(يا إيدي شيليني وختيني فى بيت الله البعشيني) التى كان السودان يعيشها قبل قرارات التصحيح الشجاعة و (ما تعاين لى) بقول شجاعة والبقولوا إنقلاب يحدثونا عن شرعيتهم!.
من عجائب بلدنا أن موظفا إداريا يلتف حول قرارات و أحكام قضائية لا تقبل الاستئناف صادرة عن المحكمة العليا!.
(عب باسط) ركز معاي كويس فى الكلام ده عارفك ما (ناقش حاجة).
قال ليك يا عمك و خلى بالك من المسمي الجاي ده ! قال إن (رئيس وزراء مجلس الوزراء المكلف) وطبعا هو (زاتو) مكلف ! شفتو المصيبة الواقعين فيها ؟ سبعة شهور وما زالت كلمة (المكلف) ملازمة لاى منصب تنفيذى فى هذه البلد.
(طيب نشوف غيرا)
اهااا عمل شنو (المبروك ده) ؟ قال ليك عمم فى خطابه رقم (أ٤و/١/أ/٥/٤/٦) بتاريخ (١٦) أبريل ٢٠٢٢م على جميع الوزارات ان تراجع قرارات المحكمة العليا الخاصة بإعادة المفصولين تعسفياً يعني بإختصار كده الوزارة الفلانية ممكن تقول ل(مولانا) بتاع المحكمة العليا والله يا مولانا الزول ده ما عاوزنه !
بعض القانونيين قالوا أن ذلك ممكناً لكن (ما بالطريقة دي) و من غير تدخل الرئيس المكلف لمجلس الوزراء (المكلف) . وتترك هذه الخطوة (إن دعت الحاجة لها) لاجراءات إدارية (بحته) هى من صلاحيات ديوان الخدمة العامة مع الوزارة المعنية شأن العائد من الفصل التعسفي شأن زملائه من (القاعدين) ! يعني أصصلاً لا يحتاج لخطاب من رئيس وزراء مكلف او من غيرو !
(طيب) الهدف شنو يا عب باسط ؟ فى تقديري هو ما نعيشه الان من حالة (البلبلة) التى تجتاح الوضع السياسي المأزوم وإشاعة نوعاً من الاحباط والتشكيك فى أن قرارات المحكمة العليا (زاتا) طلعت (كلام ساكت) . بعكس الوضع الصحيح الذى يجب أن تفهم فيه .
وإذا إستمرت حكاية (طقيش البِلّي) كالتى فعلها (الزول المكلف ده) فقد لا تكتفي المحكمة العليا فى قراراتها المستقبلية بجملة (وعلى الجهات المعنية تنفيذ الحكم) وقد تضطر أن تتأبط عصاها لتطبق قراراتها بنفسها .
قبل ما أنسي : ــــ
يااااعمك ياخ ما أي ورقة يجبوها ليك توقع عليها (فاهمني يا عب باسط) ؟
خاص بـ[متاريس]
