السبت 23/02/04

لكن كمان ما معقول يا جماعة شاشة!

بقلم: صبري محمد علي (العيكورة)

(الكلام ده نختو وين)؟

كنت قد عزمت بعد ليلة تهجد البارحة ان اضع القلم والموبايل والحاسوب ونتفرغ مع الاسرة لفرحة العيد ولم تكن لدي رغبة فى الكتابة طيلة أيام العيد إذا مد الله فى الآجال.

ووضعنا برنامج داخل (مجلس الدفاع والأمن الاسري) لفطور العيد بعد ان انهينا بسلام موضوع (أنا والكسوة والحمى) بتاع (يومتا).

و من ضمن البرنامج زيارة المدينة المنورة باذن الله على ساكنها أفضل الصلاة والتسليم ثانى أيام العيد وأتمنى ان استحلب القلم هناك بخاطرة. 

و(على هذا الأساس) تمت المصادقة على الخطة ولم يعد للموبايل منذ البارحة (شغل) سوى رد تهاني العيد أو إرسالها. 

ولكن (البث المباشر) لعضو لجنة إزالة التمكين المحلولة أو المجمدة فى العهد البائد (خالد عجوبة) هو ما قادني للنظارة و(الموبايل).

فالرجل شن هجوما عنيفا على مقرر اللجنة (اياها) السيد وجدي صالح (حفظه الله ورعاه) وقال عنه إنه مبتز وإنه …. وإنه ….. (و الله يا جماعة ما بقدر اكتبها) الدنيا عيد وأُمرنا أن نذكر محاسن موتانا. 

المهم ياصاحبي ود عجوبة قال ليك والجماعة بحصروا فى إحدى مغتنيات الشركات المصادرة (صامولة) شاف ليهو شاشة (٦٥) بوصة.

اظنها عجبته فامر ان يختوها ليهو فى عربيته يعني بلغة الكيزان كده (جنبا ليك) على جنب زي الجزار السمينة سمينة كلها بخليها على جنب! آآي والله قال شاشة .

(اللايف) كان تحت عنوان (صامولة حرامي الشاشات) … اللهم اني صائم!. 

طيب يا (عب باسط) أظن كلام ود عجوبة لم يضف شيئا جديدا لما هو معلوم للرأي العام والذي ينتظر القضاء لقول كلمته.

فمثلا حديثه عن ابتزاز تجار العملة وان اللجنة كانت دولة داخل دولة و(مش عارف) القضايا التى سجن بسببها غندور كانت تحت تهديد وابتزاز (الحواتي) وكل قضايا الكيزان كانت كيدية ومفتعلة وكده طبعا ده (كووولو) معروف. 

لكن يا جماعة ما ممكن يكتشف الناس ان دم الشهيد طلع بى (شاشة)؟ وكل الهتافات وسيصرخون ومش عارف مآتم الكيزان التى توعدهم بها (مستر صامولة) تطلع لينا فى النهاية شاشة!. 

ود عجوبة قال ان محمد الفكي رجل نزيه ولكنه صمت عن الفساد واذا (اخدناها بالراجع) يا عب باسط (بالله) شوف لى معاك (بالمرة) تصريح ياسر العطا الذي دافع فيه وامتدح اخلاق و نزاهة لجنة إزالة التمكين (الكلام ده نختو وين)؟ فى رف الشاشات مثلا؟. 

وفى الاخبار الاسفيرية ان ود الفكي اتصل بخالد طالبا منه ايقاف هذه (اللايفات) ودعاه (للمفاهمة)! لى شنو؟ اسألني يا (عب باسط) والعهده على الراوي. 

قبل ما انسي :—-

كل عام وانتم بخير قرائي الاعزاء
(وتفقدوا شاشاتكم يرحمكم الله). 

*خاص بـ(متاريس) 

الاحد ١/ مايو ٢٠٢٢م

شاهد أيضاً

الآلية الثلاثية تتنصل من خطاب إلغاء الحوار الوطني

الإطاري بين حسابات الحقل وحسابات البيدر

بقلم: إبراهيم عثمان ▪️ تخطيء أحزاب فولكر كثيراً إذا ظنت أنها بما نالته من دعم …