بقلم / صبري محمد علي (العيكورة)

ما الحكاية واضحة

وقبل ان تغرب شمس يومهم الموعود توالت فضائح فولكر وسجمانين قحت (١) وصعاليكها وقبل ان تكمل الوسائط حديثها وتحليلاتها عن لماذا (اجلوا) إجتماعهم اليوم (ياخي) قبل ما نقول أي حاجة يطلع ليك موقع (عزة) نقلا عن وثيقة مسربة من منظمة فولكر وجماعته؟.

طيب ما عاملين فيها (شفوت) إتسربت كيفن ! المهم يا عب باسط قال ليك أن هناك (٣١) شخصية سودانية تم إستغلالها ليكونوا (منصة عازلة) لتقليل الهجوم على البعثة الاممية!.

لا لا أصبر على انا لسه ما قلت (عملاء) ناس عاديين كده واولاد حلال كمان .

طيب سموهم شنو؟ وهم من وين؟ وجنسهم شنو؟ قال ليك يا (عب باسط) وشوف عيني (القريت) بيها الخبر إنهم سودانيين وسماهم (عمنا) فولكر بـ(اللجنة الدائمة للشخصيات السودانية البارزة)!.

بارزين وين؟ أسألني .

والخبر قال أن من بينهم الشيوعي الشفيع خضر ودكتور مضوي ابراهيم و(مش عارف) الحاج ورّاق ووزير الثقافة والاعلام (المعزول) فى النظام البائد فيصل محمد صالح ومعاهم الصحفية شمائل النور والبقية لم يوردهم الخبر .

(طيب ياخي) ديل شغلهم شنو؟ وبكم الشغلانة دي؟ القروش غايتو يا (عب باسط) ما جابوا سيرتها أظن المعلوم بصلهم (غُمتي) سااكت لكن قال ليك المهمة هى تقليل النقد والهجوم على البعثة الاممية والاتحاد الافريقي والايقاد وتشكيل ما اسموه بـ(منصة عازلة).

يعني بإختصار كده (يحرروا الطار لفولكر وينطوا ليك فى حلق اى واحد ينتقد البعثة والآلية الثلاثية (لأ وقال ليك) بالاضافة للتحليل المحلي لدفع رؤية الآلية الثلاثية .

يعني بالعربي كده يجيبوا ليك دكتور مضوي وفيصل بتاع الناصريين داك وناس الشفيع ينزلوا نظارة ويختوا نظارة و(يورنشو) لينا فى أفكار (الحاج) أهاا يا جماعة هى العمالة والخيانة دي كيفنها؟ إن لم تكن تلك هى خيانة عظمي يدركها طالب (سنة اولي) قانون .

والغريب يا (عب باسط) الخبر ذكر أن أختيار هذه الشخصيات تم بناءاً على معايير (أموت أنا فى المعايير ياخ) وقال ان هذه (النكرات) تعتبر شخصيات تتمتع بقبول فى الطيف السياسي والاجتماعي والجغرافي وتجسد (خلى بالك معاي) تجسد مفهوم اليونيتامس والاتحاد الافريقي والأيقاد!.

(عشان شنو)؟ قال لوضع مبادرة الآلية الثلاثية (على أنها عملية يملكها السودان) والجملة نضعها بين قوسين لخطورتها ولعكسها الصادق لمدى الكذب والغش والتدليس الذى يمارسة فولكر ومن خلفه العملاء (السجمانين) أى ان السيد فولكر (خليني اخت ليهو السيد المرة دي) اصبح يلعب على (الضب الكبير) الامين العام للامم المتحدة بالتزوير !.

ما الحكاية واضحة ان هذا (النازي) يكذب ويغش ويزور إرادة السودانيين ليتقرب بها زلفي لمعالي الامين العام ! واللا شنو يا ناس القانون ؟. 

قبل ما أنسي : ــــ

أفضحوهم قاتلهم الله .

* خاص بـ(متاريس) 

الثلاثاء ١٠/ مايو ٢٠٢٢ م