الجمعة 23/01/27

«فولكر» باشا.. فاهمني يا أسطى؟

بقلم/ صبري محمد علي (العيكورة)

خطاب حمدوك المشؤوم

الثالث من يونيو القادم هو أجل إنقضاء فترة بعثة (اليونيتامس) بالسودان التى يرأسها (النازي البغيض) الالماني فولكر وسيعقد مجلس الامن جلسة خاصة لمناقشة تمديد الصلاحية من عدمها. 

السودان بدوره ممثلاً فى وزارة الخارجية أوصل وجهة نظره وتقييمه لأداء البعثة لأعضاء المجلس كل على حده.

وأكد على لسان الوزير المكلف (عمنا) علي الصادق ووكيل الوزارة من أن أداء البعثة كان دون المطلوب وأنها عجزت عن تحقيق ما اتت من أجله.

وإن كان الرجلين لم يصرحا بالطرد إلا انه يفهم من حديثهما خلال المؤتمر الصحفي الذى عقد الخميس الماضي أنه يجب على هذه البعثة أن تغادر .

بعض الحادبين وخطباء المساجد شنوا هجوماً على السيد الوزير المكلف (كيييف يا علي) تقول يجب ان نصحح مسار البعثة وليس أن نطردها؟. 

(برأيي) أن حديث الوزير جاء دبلوماسياً كما يجب أن يكون والسيد علي الصادق (ود الوزارة يا جماعة).

لذا خاطب العالم الخارجي بهذه الثقة و(التماهي) (مش بعثتكم دي)؟ أيها الناس خلوها تب.. لكن عاوزا ليها شوية سمكرة.

والسيد علي الصادق يدرك تماماُ أن هناك (شغل كتيير) سيتم مع هذه البعثة من قبل جهات ليس بمقدوره تسميتها.

فالخارجية لديها شغل و(ناس) المخابرات كذلك لديهم شغلهم و(مش عارف) ناس (المداقرة) الما معروفين تبع شنو برضو ليهم شغلهم.

لذا أعتقد حتى ولو تم التمديد لهذه البعثة بـ(فولكر) أو بدونه فلن يكون بإمكانها ممارسة البرطعة والبلطجة والتدخل السافر الذى كان .
السودان بدوره سيقدم مآخذ كثيرة على أداء السيد (فولكر) بما فيها تقريره الاخير الذى اعتذر عنه بأنه (والله ده البكتبوه لى ناس أمجد فريد).

هذا غير الحوامة بالاردية وزيارة ناس خالد سلك و(عمنا) الدقير في بيوتهم وشراب (الشاهي) وقعاد البنابر وتصوير المظاهرات بل والمشاركة فيها.

أظن (الحاجات دي) كافية تودي (فولكر) خلف الشمس بل وقد تفتح عليه تهم التدليس والكذب وخداع الامين العام (قدس الله سره)! تكرم عينك عمو !. 

فشخصياً لا اتوقع ان تسند رئاسة البعثة (إن جدد لها) للسيد فولكر مرة أخرى. (الحاجة المهمة) برأيي التى يجب ان (يركز) عليها السودان هى عدم مشروعية خطاب حمدوك المشؤوم الذى طلب فيه وصاية البعثة.

وان يطلب السودان من الامم المتحدة (تجميد) خطاب حمدوك باعتباره خطاب (ود حرام ساكت) ليس له اب شرعي.

آآي يا جماعة ما لازم نلعب بالالفاظ نقول ليهم (جمدوها ساكت) لحين انتخاب حكومة شرعية والبرهان (زااتو) يقول أنا زاتي يا أيها الخواجات لا أملك حق طلب إبقاء هذه (المصيبة) أأقصد البعثة! فشنو (يا عب باسط)!. 

يخلوا ليك عواجيز مجلس الامن ديل راسهم لافى وما قادرين يفهموا حاجة . وأعقد جلسة وارفع جلسة و(أحححي ضهري موجعني).

فى الفترة دي يا عب باسط سيكون وجود البعثة من عدمه واحد لغاااية الانتخابات وبعد داك يحلها ألف حلّال .

لكن بالتأكيد الشغل بتاع (المداقرة والمكازة) مطلوب خلال الفترة القادمة. 

قبل ما أنسي : ــــ

الحاج (فولكر) بكل صفاقة يقول للسودانيين ان الامم المتحدة هى من تقرر التجديد له من عدمه!. 

(والله) يا فولكر باشا الجماعة ديل قبالك رسلوا راس غردون باشا لملكة بريطانيا فى شوال خيش! فشنو حقو تخليك ساكت. 

والسودانيين ديل يا عمك (يموووتوا) فى مراجعة وقراءة التاريخ (فاهمني يا أسطى)؟. 

* خاص بـ(متاريس) 

الاحد ٢٢/ مايو ٢٠٢٢ م

شاهد أيضاً

اجتماعات سيادية مع جبريل ومناوي

ببساطة

إبراهيم عثمان على الذين أيَّدوا قناعةً، أو صمتوا تواطؤاً، أو تفهَّموا محاباةً، أو عذروا تنزُّلاً، …