عزيزي الشاب «بكره» عاوزك تعمل الحركة دي..!

بقلم/ صبري محمد علي (العيكورة)

الحقوا فولكر بـ«بخرات ومحاية»

ومن ابتدع استخدام حاويات الشحن العملاقة لاغلاق الكباري هى (قحت) أربعة طويلة أيام الوالي (نمر) وحالياً ترعبهم ذات الحاويات و(التسوي كريت في القرض تلقى في شنو يا جماعة)؟. 

تلقى في (جِلدا) يعني مافى مخروش واللا (مخموم) يقول لى كان رُجال ما يفتحوها!. 

(طيب) نجي لموضوعنا المهم والذى أوجهه مباشرة لأولادنا الشباب وبناتنا الحلوات أظن مافي زول في السودان أصبح يجهل أن القحاتة طلاب سلطة وعملاء سفارات وبتاعين (عصرة) ودولارات وحاجات بالشكل ده.

وأنهم يسعون سعياً (حسيساً) لتفكيك هذا الوطن وإثارة الفوضى والاحتراب في سبيل (الكرسي) تحت دعاوى المدنية وإبعاد الجيش عن المشهد السياسي وانهم تجار دم ولم يخفوا ذلك في احاديثهم .

وكلنا عارفين يا شباب الزمن ده مافي حاجة بلاش صاح؟ 

قول لي كيف؟. 

أقول ليك أنا.. الحاج (فولكر) يوم أن علق جلسات الحوار الى أجل غير مسمى كان ذلك لسببين!. 

(اولهما) ان الحاج اخطر (عبر مخابرات دولية) ان الحوار لن يحقق له ما يريد فعاوز (يعمل رايح شوية لغاية يفكر في خطة أخرى). 

ثانياً: و(ده المهم) وهو تقديم المرحلة الأخيرة من الخطة وهي تحريك الشارع بحكاية الخمسمائة الف دولار العارفنها براكم و(الرقع) بيها ناس أربعة طويلة لهذا الغرض.

وطبعاً الوسائط أعلنت الأسعار بالدولار لمن يقتل شخصاً وحسب الوزن السياسي للمستهدف سيكون السعر ! يعني البورصة (وااره).

.الحاج فولكر والقحاتة بيهدفوا منروراء الكلام ده لأحد إحتمالين:

(والله) الحشود نجحت ودخلت القصر الجمهوري (توووش) وأعلنت حكومتها في الحالة دي (الدولارات حلااال عليكم يا قحاتة).

لا (والله) الشغلانة فشلت والشمس غابت ولسه المخروشين لافين في الشوارع.

أهاا بعد ده الحساب يجمع وعليهم إعادة باقي الدولارات (ده كان فضل فيها حاجة) .

وبعد يومين كده حا تسمع أن الحاج (فولكر) غادر البلاد مستشفياً و(حا يكب الزوغة) وتاني السودان ده لو كشكشو ليهو عيش ما بقبل عليهو.

(طيب) حا تقول لى وين الشباب المشحوطين في الشوارع ومش عارف (مساكين) مسميات الشيوعيين المستفزة لحماس الشباب الطائش ناس غاضبون وملوك الاشتباك والكنداكات وكده.

ديل يا صاحبي (حا ياكلو نيم) مع مغيب الشمس لا حا يلقوا سلك ولا صامولة ولا منقة وكل زول برجع بيتهم بما تبقى ليهو من هدوم. 

لكن الجديد في الامر يا صاحبي المرة دي ان الشرطة طالعة بوكلاء نيابة وقضاء مع تفعيل قانون حق الدفاع عن النفس.

يعني بإختصار كده تقلع ليك (إنترلوك) واللا إشارة مرور واللا تعمل اى (سيك ميك) طوااالى حار حار بتلقى نفسك وين يا (عب باسط)؟ في (الررج).

ومن المؤكد مع مستجدات وتسارع الاحداث على الجبهة الشرقية فلا شك ان قواعد اللعبة قد تغيرت مدعومة بالتفاف الشعب مؤازرا لقواته المسلحة.

والتلاحم الذي حدث من القطاع الوطني العريض أعتقد ان قواعد اللعبة قد تغيرت تماما وستصب لصالح إستقرار الوطن وإنتهاء عهد الفوضى .

وغايتو الحقوا فولكر (ببخرات ومحاية) ما يجن لينا في السودان

طبعاً كلكم يا شباب بتعرفوا حالات التسلل في كرة القدم. ولو بعض بناتنا الحلوات ما فاهمات أقول ليكم أنا.

الفريق الذكي دائما ما (يُسرِِّق) الفريق الكيشة ويُسرِّق بضم الياء وكسر الراء وتشديدها اى يجعله (سارقا) اى متسلل وفى هذه الحالة تحسب لصالح الفريق الذكي. 

(طيب) بعملوا الحركة دى كيف؟ يتفق أعضاء الفريق الذكي على الانسحاب سريعا نحو منتصف الملعب ويتركوا الفريق الآخر خلفهم فأى كورة تصل للفريق الآخر ستحسب (سارق) لصالح الأذكياء .

فالحركة دى عاوزك تعملا بكرة

قول لي كيف؟

الزم بيتك وخلي (القحاتة) داخل منطقة الجزاء

طيب ليه يا عب باسط؟. 

عشان يتكشف للعالم حجمهم الحقيقي وعددهم فخليك قااااعد في بيتكم و(أخلف رجل على رجل) وشاهد القنوات الفضائية.

و(ركز لى بالله) على قناة الجزيرة حتى تستوعب مدى الكذب والتضليل الذي ستمارسه هذه (المشٌاطة).

قبل ما أنسي : ـــ

عزيزي الشاب ما تنسى كيس التسالي وخلي أعصابك (ريلاكس) وأنت تشاهد . و بعد المغرب أخبرني عن النتيجة
فاهمني يا إبني؟. 

* خاص بـ(متاريس) 

الأربعاء ٢٩/ يونيو ٢٠٢٢ م

زر الذهاب إلى الأعلى