بقلم / صبري محمد علي (العيكورة)

مولانا …..«خليك دايس»

حا اقول ليك الحصل شنو أمس الاربعاء بالضبط ..

تعرف لمن تكون ومعاك صاحبك فى مطعم وقدامكم ديك يا الكوارع والكبدة والشيات وفى الطربيزة الجمبكم واحد كده بتاع سلبطة ولصيق قدامو صحن فول سادة.

ويبدأ المتطفل يختلق الونسة معاكم ويتظارف وبعد كلمة كلمتين يجر كرسيه عليكم ويخت صحن الفول بتاعو ويضرب معاكم الكبد والمشويات ! مش فى نوعية كده؟. 

اهااااا أمس (فولكر) عمل الحركة دى شال صحن فولو وقال لاصحاب مبادرة النداء ياجماعة تعالوا (نتفاطر) وندمج الحكاية دى.

وعشان يعمل فيها (الود) زاهد خاااالس فى الموضوع ده (جاب معاه) مندوب الاتحاد الافريقي وبتاع الايقاد

ويا قاعة الصداقة (جاك زول)!. 

طيب السؤال الطبيعي ياصاحبي (فولكر) سبق ان دعي للقاء السفراء بام ضوا بان ولم يحضر ودعي الى مؤتمر المائدة المستديرة ولم يحضر (طيب الجابو شنو الليلة) للقاء الخليفة الطيب الجد بقاعة الصداقة؟. 

اقول ليك انا ….

طبعا (المستر) فى النهاية هو موظف يسترزق الله اااى نعم (ابن ستين لزينا) بما فعله فى سوريا لكن الحكاية فى النهاية (قروش) ومخصصات ياجماعة.

فالراجل (والله اعلم) لقى الكفة رجحت مع نداء اهل السودان وفى نفس (الوكت) لا يملك الشجاعة ان يصرح بذلك. 

قول لى ليه؟. 

لأنو يا صاحبي لو صرح معناها انت زول فاشل وما قدرت تحرك قطع الشطرنج القحطاوية بمهارة ولذلك افشلت مخططنا الدولي للسيطرة على السودان عشان كده يا (حاج) ورينا عرض اكتافك وحا يعفى من منصبه ويجوع (وليداتو) .

واذا اعلن انه فك (قحط) عكس الهوا فهنا كمان وقعتو سوده لذا (قاليك) خلينى اشيل صحني ده وامش افطر مع الناس ديل فعسي ولعل. 

قول لى الكلام ده بنيتو على شنو؟

ايواااا …

مش اول سؤال سأله للخليفة ان مبادرته نادت بطرد البعثة الاممية من السودان مش قال ليهو كده ؟. 

معناها البند ده (ماكل معاهو جمبه خااالس) ومبرد ياياتو مرة واحده عشان كده قال ليك خلونى الحق (مولانا) ده امكن اقدر احنكو بكلمتين حلوين .

مش كده وبس (المستر) حاول يكذب بان بعثته لا تتدخل فى الشأن الداخلي وهى بعثة مسهلة. 

لكن يلقاها عن غافل …

طوااالي الخليفة قال ليهو (طيب ياولدنا ما جيتنا مالك) يوم عزمناك واكد ليهو ان المبادرة ليس لديها مشكلة مع الامم المتحدة ولكن مشكلتها فى (اداء البعثة)! شفتو (مولانا) حشر ليك المستر فى الزاوية الضيقة دى كيف؟. 

يعني لابساك لابساك يا فولكر !

وخيرا …..

اتى فولكر او لم يأت فأهل المبادرة ليسوا اغبياء ولن ينال فولكر منهم الا كما يبتل المخيط اذا غمس فى ماء البحر.

فهؤلاء (العلوج) لا عهد لهم ولا ذمة وعلى المبادرة ان لا تحذف حرفا واحدا عن ما تمخض عنه مؤتمر المائدة المستديرة. 

فما زيارة (فولكر) أمس للخليفة الجد الا للالتفاف ومحاولة بائسة لخلط الاوراق نيابة عن (قحط) والتى سبق ان دعيت ولم تحضر. 

و(الكواس رزقو فى كرعيه) 

فحياءً……
ارسلوا (فولكر) لان القوم لا وجوه لهم لمواجهة الشعب السوداني وفولكر جاء باحثا عن الراتب والمخصصات .

قبل ما انسي :—–

من سيحرق الكرت الالماني هم السودانيون وستذكرون ما اقول. 

مولانا …..
(خليكمولانا …..
(خليك دايس) قرررربت تمرق باذن الله. 

* خاص بـ(متاريس) 

الخميس ١٨/ اغسطس ٢٠٢٢ م