بقلم/ صبري محمد علي (العيكورة)

أحزاب «فالص» 

لا أعتقد ان هناك أيام عصيبة وقاسية يمر بها (عمنا) فولكر و(قحت) بشقيها كهذه الأيام.

حالة من الشلل التام وإنعدام البوصلة و(طششان) الشبكة الداعى الى اليأس المفضي الى الموت السياسي. 

فمن جهة فهؤلاء الناس شركاء متشاكسون لن يجتمعوا على كلمة سواء حتى يلج الجمل في سم الخياط .

ومن جهة أخرى أن المشروع الاستعماري بدأ ينهار أمام عيني (عمنا) فولكر وهو عاجز تماماً من أن يفعل شيئاً .

لذا أكثر الرجل هذه الايام من زياراته لهذه الشراذم المتناثرة من اليساريين وأشباههم من أحزاب مسك العصاية من النص.

ورقصني يا جدع في إنتظار اى (الحلتين) ستنضج أولاً .

لذا اصبحت تصريحات فولكر فى احسن حالاتها (سعدت بلقاء فلان وفلانة) بعد ان كان يصطف الرعاع خارج بابه. 

طيب (الكلام ده سببو شنو تفتكر)؟

باختصار شديد كده يا (عب باسط) ……

هو خروج المكون العسكري من المعادلة السياسية وترك أمر الاتفاق للجهات والاحزاب والواجهات والكيانات السياسية للتوافق .

فهذا القرار أربك المشهد السياسي و(كتل الدش فى عبهم) .

فما كان هؤلاء يجتمعون إلا ليجرموا العسكر ثم ينفضوا ثم يعودوا مرة أخرى ليمارسوا ذات (السيناريو) .

أما وقد خرج من التفاوض فوقفوا جميعا كحمار الشيخ في العقبة .

اقول ليك الجماعة ديل اتبهدلوا كيف ؟

طيب ياصاحبي ….

عندنا كم حزب مسجل؟ حاجة و(خرتمية) حزب صاح؟ هل فيهم حزب واحد (دق سدرو) وقال هاكم مبادرتي للتوافق؟.

ياخ (بلاش) حزب واحد (قوول) تلاته أربعة أحزاب هل وصلوا للحد الأدنى من التوافق؟.

مافى ولا واحد منهم .. ومن قال كلاماً لم يعلن عن تفاصيل مبادرته .

(طيب يا جماعة) الخليفة الطيب ود بدر ده عندو حزب؟ مالكم يا أحزابنا يا عسل (كووولكم) جريتو على مبادرته؟. 

(أصبر لى ماشي عليك في الكلام) ….حا تقول لى قناعات وإنها مبادرة شاملة وتدعو لجمع الصف الوطنى وكده !.

طيب دى جات من رجل وطني غيور لا حزبي مهموم بقضايا الوطن (إنتو) وينو فهمكم مع الرجال؟.

(معناتا) إنتو أحزاب (فالصو) ومفلسة ولا تملك رؤية واضحة للخروج من مآزق السياسة وبتاعين (عشاء ساكت). 

وما عندكم فهم تحكمونا بيهو (خااالس) !. 

غايتو بصراحة أنا شايف ماعيب ان تتشبهوا بالخليفة إن لم تكونوا مثله إن التشبه بالرجال فلاح .

أما ناس (أربعة طويلة) وأولاد عمهم (ناس) الميثاق فهما (بالضبط) التعيس وخايب الرجاء.

و(شخصياً) لا أتوقع منهما إلا المزيد من الفرامل والتوهان والتلاشي.

وبمناسبة التلاشي دى يا جماعة (الحقوا لينا) وزارة المالية بتاعت (جبرين) وشركة الموارد المعدنية بتاعت (اردول).

الجماعة ديل ماااا كفاهم لا مجلس وزراء يتابع ولا مجلس تشريعي يحاسب ويستدعي الحكاية دى حدها وين؟ و(الطيارات شغااالة). 

بالأمس (ولدنا) مبارك اردول قال لينا انه خايف (الذهب ينضب)!، فيا ابني عمك البكتب ده (جيلوجي).

ولو فتحنا الملف ده الكلام بجرجر لو أخدناهو بالراجع حايزعل (الخال) والفاخر و..و… فحقو كلمة (ينضب دى) تاني ماتقولا.

فخليك حريف.. بشر الناس أنو البلد دى بخيرا كان من الذهب او غيره وربنا يجازى (الكان السبب) .

قبل ما أنسى : ــــ

(عمنا) فولكر قال إن (٤٠) الف مواطن سوداني وصلتهم مساعدات الأمم المتحدة!.

في زول لاقاهو كيلو عدس طاير يا جماعة؟ ياخى ما أسهل الكذب لدى هؤلاء .

حبيبي فولكر :

(لو أعدتااا في البلد دي أربعين سني ما عم توصل للى بدك إياهو). 

* خاص بـ(متاريس) 

الخميس ٢٥/ أغسطس ٢٠٢٢م