الجماعة منتظرين «ابريق الغسيل» للعشاء

بقلم/ صبري محمد علي (العيكورة)

توافق شامل أو صندوق انتخابات

(المستر) السبعيني ياسر عرمان الذى (يقال) انه رئيس الحركة الشعبية شمال بعد التسريح بإحسان الذى تم بينه وبين مالك عقار.

نقل عنه بالأمس انه قال : لا نريد تفكيك الجيش ! ولا نسعى لنشوب مواجهة بينه وبين الدعم السريع ! بسسسسم الله (هسه الكلام ده لزومو شنو) ؟. 

وقال انه يتهم الإسلاميين بالسعي للوقيعة بين الجيش والدعم السريع وقال (انو خايف) أو يحذر من ان يتحول الجيش لجناح للحركة الإسلامية. 

(شفتو الهضربة دى كيف) ؟

وعرمان الذى تحوم حوله شبهات الانضمام للدعم السريع كمستشار سياسي وامني كما راج بالمواقع قبل أيام (هذا المصيبة) لم يخف إمتعاضه من كتابات السيد العقيد الركن (ونصك عليها بالاسنان) الحوري إغاظة لعرمان وأمثاله .

عرمان قال ليس من المعقول (للكاتب الحوري) ان يخرج علينا يومياً يكتب عن المدنيين !. 

اظن ان عرمان يجب ان يساءل عن هذه الجملة في حق السيد العقيد الركن إبراهيم الحوري.

فالسيد الحوري هو ضابط بقوات الشعب المسلحة ورئيس تحرير صحيفة القوات المسلحة (رغم انف عرمان وأمثاله).

ولكنه الازدراء و الاستخفاف اليائس في اقبح صوره ان ينعته (بالكاتب) متجاوزاً الرتبة العسكرية !. 

السيد اللواء معاش فضل الله برمة ناصر رئيس حزب الامة نقل عنه انه التقى الخال قبل اسبوعين وانه (لمس) منه انه لا يمانع من تسليم الحكم للمدنيين .

(قال لمس قال) …!!

وقال قبل كده التقى البرهان والبرهان قال لن نسلم الحكم الا بتوافق تام او انتخابات وحذر برمة من نشوب صراع بين الرجلين.

(شفتو الفتن دى كيف)؟
ملعونة ملعون من ايقظها !
(آآي ياجماعة) ده شنو ؟
ده استجداء من لا يستحق لمن لا يملك !
ومعاها (المديدة حرقتني كمان). 

الكلام ده يقابلو من الطرف الآخر ….

تصريحات سعادة العميد طاهر أبو هاجة المستشار الإعلامي لرئيس مجلس السيادة الذى جاء فيه (مافى) حكومة بوضع اليد و(الفهلوة) السياسية.

وقال ان القوات المسلحة ملتزمة بنص قانونها والدستور بحماية امن واستقرار الوطن .

فإما توافق تام أو انتخابات (أظن الكلام ده ما داير ليهو درس عصر) !
ده كلام منو يا (عب باسط) ؟. 

ده كلام أبو هاجة و (اللى هو) يعني كلام منو ؟ البرهان .

ايواااا (برافو) عليك. 

في جماعة كده …..

لفحو كلام (حميدتي) وطاروا بيهو بأنه يدعم مشروع الدستور الانتقالي الابن الغير شرعي للجنة التسييرية للمحامين (وقال ليك بلا خجلة) …!. 

و الذى لاقى قبولاً كبيراً من المجتمع الدولي.

.ولكن بمتابعتنا لم نجد ما يدعم هذا (الطشت القحطاوي) فالسيد حميدتي قال ما معناه انه يدعم (كل) ما يقود للتوافق الوطني . والكلام ده ليهو كذا يوم .

لكن سعي (القحاطة) خلف حميدتي لتوريطة في تصريح من (هذا الذى منو) يجعلنا نقرع الجرس بشده في وجه مستشاريه (أنتبهوا) الزول ده مستهدف.

ولربما تعرض عليه صفقة تنداح بين فض الاعتصام والتصريح الداعم لدستور القحاطة وانتو عارفين طيبة الخال !. 

وأنا كلمتكم غايتو !

عشان كده يا جماعة نقول …
للناس المنتظرين الابريق لغسيل الايدين قبل العشاء (حقو) ينسو الموضوع ده خااالس.

مافى حاجة إسمها تسليم حكم ساااى كده . في حاجة إسمها توافق شامل أو صندوق انتخابات.

والمزازاة الحاصلة اليومين ديل حول صيوان العشاء بتتعب رجولكم ساى بلا فائدة فيا جماعة (العندو عمار) يتفقد صفوف حزبه ويستعد للانتخابات أحسن ليهو من (الفرنبة) و اللجلجة والرجفة الحاصلة اليومين ديل .

قبل ما أنسي : ـــ

أيها الناس اصطفوا خلف قواتكم المسلحة وأجهزتكم الأمنية يرحمكم الله .

خاص بـ[متاريس]
الاحد ١٨/ سبتمبر ٢٠٢٢م

تعليق واحد

  1. الرهان في المحصلة النهائية للانتخابات، ونعلنها على الملأ أن الفائز جيل الشباب فاصواتهم راجحة فهم أكثر من 60% من تركيبة الشعب وهم الجيل الذي هزم البشير و معشره من جماعة الإسلام السياسي، فالانتخابات لنا ولم يعد لكم جن أو ملائكة لتزويرها و خجها كما كانوا يفعلون، الزمن تغير وهذا الجيل صعب المراس وراكب راس يا ود العيكورة والفورة ستة صفر. بالمناسبة ماك ماشي تعزي الملكة العملت مشروع الجزيرة ولا حردان داير اعتزار و تعويض.

زر الذهاب إلى الأعلى