الأربعاء 23/02/08

خرفان مناوي

بقلم / صبري محمد علي (العيكورة)

السيد مناوي.. شكر الله سعيك 

ياخى نفسي اعرف الشخص (الفلته) هذا الذى دل حاكم اقليم دارفور السيد مني اركو مناوي على هذه الفكرة (الجهنمية).

السيد مني يتبرع لدولة قطر الشقيقة بثلاثة الف خروف مساهمة منه فى التخفيف على قطر (مصاريف) فعاليات كأس العالم !. 

(اااي والله) ده الخبر بقول كده !.

غايتو من ناحيتى انا بقول للسيد مناوي كتر الف خيرك ايها القائد ومااااقصرت وياها المحرية فيك. 

لكن يا شيخنا ….

منو القال ليك ان الدولة المضيفة مسؤولة عن اطعام الزوار (ياسيدي) دى زبدة الفعالية. 

قطر حققت وستحقق مليارات الدولارات جراء هذ المهرجان العالمي.

هل تعلم ان (تلاااته) دول ستستضيف الفعالية القادمة ! تفتكر ليه؟ الكشكوش ياعمك .

السيد مناوي والله كان أولى بهذه الخراف معسكرات دارفور او منكوبي السيول والفيضانات.

لكن يبدو انك (زول طيب) ومافاهم الحكاية ياخي القطريين سيستردوا كل ما خسروه فى انشاء البنية التحية من (ماتش) واحد .

المشكلة ياسيد مناوي ليس فيكم المشكلة فى مستشاريك ياخى (العملة) دى انا ما بعملا خليك من شخص فى مقامكم العالى .

حاااكم لاقليم بمساحة فرنسا وضعف مساحة الاردن (تفوت عليهو حاجة زي دي) !. 

ودى مشكلتنا فى السودان بعد التغيير كل زول شايل ليهو طار بجهة.

فلو تركتوا هذا التبرع يتم عبر الدولة المركزية فعلى الاقل كان (بوقعوا ليكم الكلام) وبرجعوا ليك غنمك.

ويدلونكم على المشاركة الشرفية والحضور البهي المشرف الذى يمكن ان تقدمه للدوحة !. 

لكن هذا نتاج طبيعي للعواسة المتعددة فى الدولة الواحده.

واحدين هداياهم ذهب واخرين فواكهة واخرين خراف والمواطن خارج المعادلة. 

طيب طالما الحكاية كده .. عندي اقتراح وجيه جدا وهو ..

ان تسارع خالاتنا وعماتنا فى اعداد (الابري) والحلو مر مساهمة منهن فى كأس العالم. 

مش (بقطع العطش) ؟ واظنه اوفق وانسب من حكاية خرفان مناوي كدى فكروا فيها .

قبل ما انسي : —-

السيد مناوي ياخ شكر الله سعيك لكن كان تشاورني .

خاص بـ[متاريس]

الاحد ٢٥/ سبتمبر ٢٠٢٢م

شاهد أيضاً

الآلية الثلاثية تتنصل من خطاب إلغاء الحوار الوطني

الإطاري بين حسابات الحقل وحسابات البيدر

بقلم: إبراهيم عثمان ▪️ تخطيء أحزاب فولكر كثيراً إذا ظنت أنها بما نالته من دعم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *