تغريدات حرة : رسائل لوالي الخرطوم وإدارة الكهرباء
ونترك هذه المساحة اليوم لرسائل بعض المواطنين حول ازمة كهرباء امدرمان وفشل والي الخرطوم وإدارة الكهرباء في إعادة التيار الكهربائي.
المعروف إن المسيرات التي قصفت سد مروي قبل اكثر من اسبوع تضررت منه ولايتي نهر النيل والشمالية، بحسب افادة إدارة الكهرباء.
وتم فصل التيار عن ولاية الخرطوم للحفاظ على المحول المغذي لها من أي أضرار، وفقا لمنشور كتبه إعلامي نقلا عن “مصادر عليمة”.
وقبل أيام عادت الكهرباء لولايتي نهر النيل والشمالية بعد إصلاح الضرر، بينما لازالت ولاية الخرطوم تعيش في الظلام رغم عدم حاجة المحول لأي صيانة.
قال لي أحدهم “ناس الكهرباء ديل عندهم خساسة بيعرفوها براهم، قاطعين كهربتنا عشان توريدة امدرمان بسيطة بسبب الجبادات”.
وأخر انفعل قائلا “انت الوالي دا تلقاهو حايم في الفارغة، فلان صمد في بيتو، والكنيسة ديك سرقوها، وفي موضوع ملان زي الكهرباء ما اتحرك”.
وثالث ضاحكا بسخرية “الناس ديل شكلهم عندهم مولدات وانظمة طاقة شمسية عايزين يصرفوها بأي طريقة، وقالوا مافي غير الثورات عشان جلدهم تخين وبستحملوا”.
لكن رحمة الله تعالى على عباده فوق توقعات الظالمين، فقد شهدت امدرمان خلال اليومين الماضيين بحمدالله أجواء باردة نهارا، وباردة جدا ليلا استخدم فيها الناس البطاطين.
اما المياه فقد ساهمت كل حارة في تشغيل بئرها الجوفي، بينما تكفل كل من لديه مولد بشحن الهواتف واللمبات المخزنة للمواطنين مجانا.
*الصادق عبدالرحيم
